Home » Social » بالعامية – عن المطاعم وخدمة العملاء

بالعامية – عن المطاعم وخدمة العملاء

Published by on January 29th, 2015

.

مين منّا ما إتصل ولو مرة بمطعم لطلب توصيل او ما يـُعـرَف بال delivery

مين منّا ما صار معه ١٠٠ قصة ورواية  إمّا عالتليفون أو مع عامل التوصيل

حبيت قدملكم عينة بسيطة من بعض الردود والمواقف يلي ممكن تصير معكم …

 خدمة الهاتف 

العامل النشيط .. هيدا يلي بيسمِع درسه قبل ما تحكي “تانكس فور calling … معك Elvis .. كيف فيني ساعدَك”

هلق إجمالاً بدك شي كم ثانية لتستوعب الموضوع بس cava بيمشي الحال بالآخر

العامل النايم .. هيدا يلي بتقله Alo .. بيقلَك Alo وبيسكت .. بترد بتقلو Alo .. كمان بيرد Alo ..

وهيك إجمالاً من بعد كذا سؤال وجواب بيمشي الحال

العامل الحقنة .. لازم يهجي العنوان كلمة كلمة

“مسيو خالد؟” وبيسكت … بس تقول “ايه” بيكمِل … “بناية عيتاني؟” وبيسكت

كمان بدها شوية صبر خصوصي بس يخلـِص ويقلَك “كيف فيني ساعدَك؟” .. 

العامل الذكي .. يلي مصِر يعرف الطلبية لكم شخص ..

مرة سألته “ليش حابب تعرف” جاوبني “لإنصحَك بكمية الأكل” ..

انو عأساس حإطلب ٤ سندويشات ويقللي هو “لأ استاذ .. خود ٢ بس بيكفوا”

وفي كتير غيرن .. شي مصِر عالفرنسي … وشي بدو يبيعَك dessert بالقوة … “كتير خفاف استاذ سماع منّي” …

وشي كل مرة بيضيع رقمك او الكمبيوتر منزوع … الخ

طلبنا الطلبية .. انبسطنا .. نص ساعة بيكون الأكل عندك .. وإذ بيوصل عامل التوصيل

 خدمة التوصيل

العامل المستعجِل .. بيلقَط الاسانسور بايدو وقبل ما تقول “بونسوار” بيقلَك “٢٣ الف” .. سريع وما بيوجع الراس

العامل الحربوق .. يلي بس بدك تدفع بينسى صف ال MATH .. بيصير يعطيك المصاري الف ورا الف لتقلو بس ..

بيكون بدَك مثلا ٢٠ الف بيصير “١٥الف والف اديش صاروا  ١٦ .. اوكي ١٦ .. ١٦الف والف …  “

وفي غيرهم كتير .. شي قالبين معو الاكلات فبتوصل البطاطا سابحة بالعصير .. وشي بيجبلك غير طلبية .. وهيك

وإذا تأخر ودقيت عالمحل .. يا “ايه ايه مشي لعندك .. بيكون واصل” .. أو “بيكون ضيع بالعنوان .. يلا تن مينتس

.

عن عاملي خدمة الهاتف والتوصيل .. قصص وحكايات كتير …

المهم نتذكر انه معظم الاوقات في ظروف حكمِت مصير هالناس … مش لنتمقطَع فيهم ..

وبالنهاية المسؤولية على رب العمل يطوِر وينمي قدراتهم .. بس مين سامع ومين فاضي

© Slowding
Twitter Auto Publish Powered By : XYZScripts.com